កំពង់ស្ពឺ៖ គ្រោះថ្នាក់ចរាចរណ៍ដោយរថយន្តចំនួន ៩គ្រឿងបុករះបន្តកន្ទុយគ្នានៅលើកំណាត់ផ្លូវជាតិលេខ៤ ចន្លោះគីឡូម៉ែត្រ១០៣-១០៤ នៅចំណុចក្បែរចំណោទយាយម៉ៅពេជ្រនិល នារសៀលថ្ងៃទី០៦ ខែមិថុនា បណ្តាលឱ្យមនុស្សចំនួន ១នាក់ស្លាប់ និង២នាក់ទៀតរងរបួសធ្ងន់។

តាមរបាយការណ៍របស់ស្នងការដ្ឋាននគរបាលខេត្តកំពង់ស្ពឺ ករណីគ្រោះថ្នាក់ចរាចរណ៍នេះបានបណ្តាលឱ្យស្ត្រីម្នាក់ស្លាប់ និងបុរស ២នាក់រងរបួសធ្ងន់ធ្ងរ ហើយខូចខាតរថយន្តចំនួន ៩គ្រឿង ក្នុងនោះមានរថយន្ត៣គ្រឿងខូចខាតធ្ងន់ធ្ងរ ហើយរថយន្តផ្សេងទៀតដែលរងគ្រោះតិចតួច ត្រូវបានម្ចាស់យកទៅជួសជុលដោយខ្លួនឯង។

សមត្ថកិច្ចបានបញ្ជាក់ថា មុនពេលកើតហេតុ មានរថយន្ដមួយគ្រឿង ម៉ាក FREIGHT LINCER ពណ៌ស ពាក់ស្លាកលេភ្នំពេញ 3D-0827 សណ្តោងរ៉ឺម៉ក់ ពាក់ស្លាកលេខភ្នំពេញ 4A-5446 បានបើកមកបុករះរថយន្ដជាច្រើនគ្រឿងដែលឈប់ចតរង់ចាំការសម្រួលចរាចរណ៍ក្នុងខណៈពេលក្រុមការងារជួសជុលស្ថាបនាផ្លូវជាតិលេខ៤ កំពុងតែបញ្ជាចរាចរណ៍ជូនអ្នកដំណើរតាមផ្លូវជាតិលេខ៤ បានទៅមកម្ដងម្ខាង។

កម្លាំងនគរបាលចរាចរណ៍ នៃអធិការដ្ឋាននគរបាលស្រុកភ្នំស្រួច បានយកវត្ថុតាងមធ្យោបាយបង្កមករក្សាទុកនៅ អធិការដ្ឋាននគរបាលស្រុកភ្នំស្រួច ដើម្បីចំណាត់ការកសាងសំណុំរឿងតាមនីតិវិធី។ ចំណែកសពជនរងគ្រោះត្រូវបានប្រគល់ឱ្យក្រុមសាច់ញាតិយកទៅធ្វើបុណ្យតាមប្រពៃណី ខណៈជនរងគ្រោះ២នាក់ទៀតកំពុងសម្រាកព្យាបាលនៅមន្ទីរពេទ្យ៕